Զգուշացում՝ իրավաբանական անձանց փորձում են մոլորեցնել կեղծ զանգերով․ ՀՀ արդարադատության նախարարություն

Վերջին օրերին արձանագրվել են դեպքեր, երբ հեռախոսազանգերի միջոցով փորձ է արվում մոլորության մեջ գցել իրավաբանական անձանց, այս մասին հայտնում է ՀՀ արդարադատության նախարարությունը նշելով, որ Իրավաբանական անձանց պետական ռեգիստրի գործակալությունը տեղեկություններ է ստացել, որ մի շարք իրավաբանական անձանց ներկայացուցիչներ ստացել են հեռախոսազանգեր այն անձանցից, որոնք ներկայանում են որպես «Գործընթաց» թերթի ներկայացուցիչներ։

Զանգերի ընթացքում վերջիններս հորդորում են հրապարակային ծանուցումները չտեղադրել azdarar.am կայքում՝ պնդելով, թե կայքում տեղադրված ծանուցումները չեն պահպանվում կամ ջնջվում են, ինչպես նաև, որ այն պաշտոնական կայք չէ։

Գործակալությունը պաշտոնապես հայտարարում է, որ այս տեղեկությունները չեն համապատասխանում իրականությանը։ azdarar.am-ը Հայաստանի Հանրապետության հրապարակային ծանուցումների պաշտոնական ինտերնետային կայքն է, և այնտեղ ծանուցումների տեղադրումը կարգավորվում է «Ինտերնետով հրապարակային և անհատական ծանուցման մասին» ՀՀ օրենքով։

Իրավաբանական անձանց պետական ռեգիստրի գործակալությունը հորդորում է վստահել միայն պաշտոնական աղբյուրներին և չառաջնորդվել հեռախոսազանգերով կամ այլ ոչ պաշտոնական եղանակներով տրամադրվող չստուգված տեղեկություններով։