Երևանի քաղաքապետի խոսնակը հայտնել է իր անվերապահ աջակցությունը դպրոցի տնօրենին

Երևանի քաղաքապետի մամուլի խոսնակ Ջուլիետա Ազարյանն անդրադարձել է Միքայել Միրզոյանի անվան երաժշտական դպրոցի տնօրեն Իրինա Մկրտչյանի շուրջ ստեղծված իրավիճակին՝ ընդգծելով, որ հանրային քննարկումներում անհրաժեշտ է առաջնորդվել փաստերով, հարգել անձնական կյանքի անձեռնմխելիությունն ու անմեղության կանխավարկածը։ Ազարյանը նաև իր անվերապահ աջակցությունն է հայտնել տնօրենին։

«Կարծում եմ՝ սա տնօրենի աշխատանքի և արձանագրված իրական արդյունքի մասին ամենախոսուն փաստն է», — գրել է իր ֆեյսբուքյան էջում Ջուլիետա Ազարյանը՝ ներկայացնելով դպրոցի աշակերտների թվի աճի վերաբերյալ տվյալները։

Ըստ Ազարյանի հրապարակման՝ տնօրենի նշանակման պահին դպրոցն ունեցել է 185 աշակերտ, իսկ ներկայումս նրանց թիվը գերազանցում է 960-ը։ Նրա փոխանցմամբ՝ այս պահին դեռևս տասնյակ ընդունելության դիմումներ կան։

Քաղաքապետարանի խոսնակը նաև շնորհակալություն է հայտնել այն լրագրողներին և քաղաքացիներին, որոնք հեռացրել են տեսանյութը իրենց սոցիալական էջերից՝ կարևորելով մարդու արժանապատվության, անձնական կյանքի անձեռնմխելիության և անմեղության կանխավարկածի սկզբունքները։

Ազարյանի խոսքով՝ հանրային հետաքրքրությունը չպետք է վերածվի անձնական կյանքի շահարկման։

Հրապարակման վերջում նա իր անվերապահ աջակցությունն է հայտնել դպրոցի տնօրենին։

Հիշեցնենք, որ նոյեմբերի 7-ին համացանցում աղմուկ էր բարձրացրել Միքայել Միրզոյանի անվան երաժշտական դպրոցի տնօրեն Իրինա Մկրտչյանի մասնակցությամբ տեսանյութը։

Տարածված կադրերում երևում էր, թե ինչպես է կինը կաթուցիչի միջոցով ծխում անհայտ նյութ։ Սոցիալական ցանցերում տեսանյութը բուռն քննարկումների առիթ էր դարձել։

Ավելի ուշ Իրինա Մկրտչյանը հանդես էր եկել պարզաբանմամբ՝ նշելով, որ տեսանյութը նկարահանվել է շուրջ 8-9 տարի առաջ՝ ամուսնության ընթացքում, նախկին ամուսնու հեռախոսով։ Նա պնդել էր, որ տեսանյութի հրապարակումը նախկին ամուսնու կողմից իր նկատմամբ իրականացվող շանտաժի և վրեժխնդրության դրսևորում է։

Տնօրենը նաև հայտնել էր, որ պատրաստվում է համապատասխան հաղորդում ներկայացնել իրավապահ մարմիններին՝ խնդրելով զերծ մնալ տեսանյութի հետագա տարածումից։