ՎԶԵԲ-ը 20 մլն դոլար է տրամադրում Հայաստանում փախստականների և երիտասարդ ձեռնարկատերերի աջակցությանը

Վերակառուցման և զարգացման եվրոպական բանկը (ՎԶԵԲ) 20 միլիոն ԱՄՆ դոլարի (մոտ 17.1 միլիոն եվրո) ֆինանսավորման փաթեթ է տրամադրում Հայաստանում՝ փախստականների և երիտասարդ ձեռնարկատերերի համար ֆինանսական միջոցների հասանելիությունը բարելավելու նպատակով, այս մասին հայտնում է ԵՄ-ն Հայաստանում կազմակերպությունն ֆեյսբուքյան իր էջում:

Ֆինանսավորման փաթեթը համալրվում է Եվրոպական միության կողմից ֆինանսավորվող դրամաշնորհներով, ռիսկերի ապահովագրությամբ և տեխնիկական աջակցությամբ։ Նախաձեռնության նպատակն է աջակցել ավելի մեծ թվով մարդկանց կյանքի կոչել իրենց բիզնես գաղափարները, ընդլայնել ձեռնարկատիրական գործունեությունը և ստեղծել նոր տնտեսական հնարավորություններ։

ՎԶԵԲ-ում նշում են, որ ծրագիրը հանդիսանում է Հայաստանում ներառական աճի խթանմանն ուղղված բանկի ավելի լայն հանձնառության մաս։ Նախաձեռնությունը միտված է տնտեսական ակտիվության ընդլայնմանը, խոցելի խմբերի աջակցությանը և երիտասարդների տնտեսական ներուժի առավել արդյունավետ իրացմանը։