Նարեկ Նալբանդյանը չի կարողացել ավարտին հասցնել «Հրազդանցեմենտի» ձեռքբերման գործարքը

Գործարար Նարեկ Նալբանդյանին չի հաջողվել ավարտին հասցնել «Հրազդանցեմենտ» գործարանի ձեռքբերման գործարքը։ «ԱՄԻՕ» բանկին պատկանող գործարանը սեպտեմբերի 2-ին սնանկության դատարանի կազմակերպած աճուրդում 11 մլրդ 101 մլն դրամով վաճառվել էր Նալբանդյանին պատկանող «Պրոյեկտ Ինտեր-Ինվեստ» ընկերությանը։

Սակայն գործարքը չի կայացել։ 2026 թվականի հոկտեմբերի 5-ին գործարանի սնանկության գործով կառավարիչը դատարան է ներկայացրել հաշվետվություն՝ տեղեկացնելով, որ աճուրդը համարվում է չկայացած։

Սնանկության դատարանի որոշումների ուսումնասիրությունից «Հետք»-ը տեղեկացել է, որ սեպտեմբերի 2-ի աճուրդի արդյունքներն անվավեր են ճանաչվել, քանի որ հաղթող ճանաչված «Պրոյեկտ Ինտեր-Ինվեստ» ընկերությունը չի վճարել գործարանի ձեռքբերման համար առաջարկված 11 մլրդ 101 մլն դրամը։

Աճուրդի արդյունքների չեղարկումից հետո Նարեկ Նալբանդյանի ընկերությունը դիմել է դատարան՝ գործարանի գույքը երեք ամսով վարձակալելու թույլտվություն ստանալու համար, սակայն դատարանը մերժել է այդ խնդրանքը։

Գործարքի ֆինանսավորման աղբյուրը հայտնի չէ։ Հնարավոր է՝ այն նախատեսվում էր իրականացնել պետական մասնակցություն ունեցող «ԱՄԻՕ» բանկի տրամադրած վարկային միջոցներով։