Վրաստանի ԱԳՆ–ն արձագանքել է ԵՄ պատժամիջոցներին

Վրաստանի արտաքին գործերի նախարարությունը ափսոսանք է հայտնում Եվրամիության 21-րդ պատժամիջոցների փաթեթում Կուլևիի նավթավերամշակման գործարանը ներառելու որոշման կապակցությամբ: Այս մասին ասվում է Վրաստանի արտաքին քաղաքական գերատեսչության հայտարարության մեջ։

Հայտարարության մեջ նշվում է, որ Վրաստանը լիովին պահպանում է Եվրամիության կողմից սահմանված պատժամիջոցների ռեժիմը, հաշվի է առնում այդ ռեժիմի համատեքստը և ձեռնարկում է բոլոր միջոցները, որպեսզի երկրի տարածքը չօգտագործվի պատժամիջոցները շրջանցելու համար։

«Այս ուղղությամբ Եվրամիության հետ համագործակցությունը հիմնված է թափանցիկության և բացության սկզբունքների վրա։ Եվրամիության 21-րդ պատժամիջոցների փաթեթի նախապատրաստման ընթացքում վրացական կողմը Եվրոպական հանձնաժողովին ներկայացրել է սպառիչ տեղեկատվություն և համապատասխան փաստաթղթեր, որոնք միանշանակ հաստատում են, որ Կուլևիի նավթավերամշակման գործարանը պատժամիջոցների ցանկում ներառելը չունի որևէ փաստական և իրավական հիմք։ Վրաստանի ԱԳՆ–ը հուսով է, որ որոշմամբ նախատեսված վեցամսյա ժամկետի ընթացքում Եվրահանձնաժողովը և ԵՄ անդամ պետությունները կառաջնորդվեն արդարության սկզբունքով և կվերանայեն այդ որոշումը»,–ասվում է հայտարարության մեջ։