Վրաստանի ԱԳ նախարար. Թբիլիսին ողջունում է Հայաստան-Ադրբեջան և Հայաստան-Թուրքիա հարաբերությունների կարգավորման առաջընթացը

Վրաստանի արտաքին գործերի նախարար Մակա Բոչորիշվիլին հայտարարել է, որ Թբիլիսիի գլխավոր նպատակն է տարածաշրջանը վերածել կայունության, տնտեսական զարգացման և բարգավաճման տարածքի: Այս մասին հայտնում են վրացական ԶԼՄ-ները ներկայացնելով նախարարի դիրքորոշումը տարածաշրջանային գործընթացների վերաբերյալ։

Բոչորիշվիլիի խոսքով՝ հարևան պետությունները պետք է հնարավորություն ունենան լիարժեքորեն իրացնել իրենց տնտեսական ու կապուղային ներուժը, ինչը հնարավոր է միայն ընդհանուր շահերի և խորացված գործընկերության հիման վրա։

Անդրադառնալով հարևան երկրների միջև ընթացող բանակցություններին՝ Վրաստանի արտաքին քաղաքական գերատեսչության ղեկավարը բարձր է գնահատել վերջին շրջանի միտումները.

«Մենք ողջունում ենք Ադրբեջանի և Հայաստանի միջև հարաբերությունների դրական դինամիկան։ Հույս ունենք, որ այս գործընթացը կնպաստի տարածաշրջանում երկարատև խաղաղության հաստատմանը։ Իր հերթին, Վրաստանը պատրաստ է շարունակել իր ներդրումը տարածաշրջանում խաղաղության, կայունության և կառուցողական համագործակցության ամրապնդման գործում»։

Բացի այդ, Մակա Բոչորիշվիլին հատուկ շեշտել է նաև Երևանի և Անկարայի միջև ընթացող երկխոսությունը՝ նշելով, որ վրացական կողմը ողջունում է Թուրքիայի և Հայաստանի միջև հարաբերությունների կարգավորման գործում ձեռք բերված առաջընթացը։