Վրաստանը կարևորում է Հայաստան-Ադրբեջան խաղաղության գործընթացը․ Շալվա Պապուաշվիլի

«Մենք մաղթում ենք Նիկոլ Փաշինյանին ամենայն հաջողություն։ Վրաստանի վարչապետը երեկ շնորհավորել է նրան ընտրություններում հաղթանակի կապակցությամբ», — լրագրողներին ասել է Վրաստանի խորհրդարանի նախագահ Շալվա Պապուաշվիլին, հայտնում է վրացական 1tv.ge լրատվականը։

Պապուաշվիլիի խոսքով՝ տարածաշրջանային փոփոխվող զարգացումները, Ադրբեջանի և Հայաստանի միջև խաղաղության համաձայնագրի հասնելու ուղին, բաց սահմանների նշանակությունը, ինչպես նաև երկու երկրների միջև շարունակվող երկխոսությունը կարևոր են Վրաստանի կայունության և բարգավաճման համար։

«Տարածաշրջանում խաղաղությունն ու կայունությունը մեզ համար առաջնային նշանակություն ունեն, սակայն Վրաստանը միայնակ չի կարող ապահովել դրանք։ Տարածաշրջանի բոլոր պետությունները պետք է հանձնառու լինեն այս ընդհանուր նպատակին։ Նիկոլ Փաշինյանի խոստումը՝ ապահովել խաղաղություն և կայունություն Հայաստանում, ի վերջո նշանակում է խաղաղություն և կայունություն ամբողջ տարածաշրջանի համար։ Նման առաջընթացը կօգնի յուրաքանչյուր երկրի և նրա ժողովրդին», — ընդգծել է Շալվա Պապուաշվիլին։