Վիճաբանություն և ծեծկռտուք՝ Արմավիրի մարզում․ «Կալիֆորնիա» գիշերային ակումբի բարմենին ծեծի են ենթարկել և հնչեցրել հայհոյանքներ

Մայիսի 15-ին ծեծկռտուք է տեղի ունեցել Արմավիրի մարզում գտնվող «Կալիֆորնիա» գիշերային ակումբում։ Ժամը 06։40-ի սահմաններում ոստիկանության Վաղարշապատի բաժին տեղեկություն է ստացվել, որ Արգավանդի խճուղու ակումբում քաղաքացու են ծեծում, հայտնում է Shamshyan.com–ը։

Ինչպես հայտնում է ֆոտոլրագրող Գագիկ Շամշյանը, ոստիկանների ձեռնարկած միջոցառումների արդյունքում պարզվել է, որ Երևանի բնակիչ 40-ամյա Վահան Թ․-ն ընկերների հետ ակումբում վիճաբանել է բարմեն՝ 32-ամյա Մելքոն Մ․-ի հետ՝ նկարահանելու հարցի շուրջ։

Այնուհետև նրանք բարմենին հրավիրել են դուրս, հայհոյել և ձեռքերով ու ոտքերով հարվածներ հասցրել նրան։ Ավելի ուշ բախումը շարունակվել է նաև ակումբի ներսում, որտեղ կրկին հարվածներ են հասցվել Մելքոն Մ․-ին՝ պատճառելով մարմնական վնասվածքներ։

Ոստիկանությունը միջոցառումներ է ձեռնարկում Վահան Թ․-ին և դեպքի մյուս մասնակիցներին հայտնաբերելու ուղղությամբ։

Դեպքի փաստով նյութերը փոխանցվել են ՀՀ Քննչական կոմիտեի Արմավիրի մարզային քննչական վարչության Վաղարշապատի քննչական բաժին։