Տարածվում է անհիմն պնդում, թե Ադրբեջանի արտաքին գործերի նախարար Ջեյհուն Բայրամովը հայտարարել է, որ Նիկոլ Փաշինյանի հաղթանակը ընտրություններում Թուրքիայի և Ադրբեջանի հաղթանակն է

Համացանցում տարածվում է անհիմն պնդում, թե Ադրբեջանի արտաքին գործերի նախարար Ջեյհուն Բայրամովը հայտարարել է, որ Նիկոլ Փաշինյանի հաղթանակը ընտրություններում Թուրքիայի և Ադրբեջանի հաղթանակն է։

Մենք մանրակրկիտ ուսումնասիրել ենք ադրբեջանական տեղեկատվական դաշտը և չենք հայտնաբերել որևէ աղբյուր, որը կհաստատի նման հայտարարության գոյությունը։ Խոսքը բացահայտ ապատեղեկատվության մասին է, որը տարածվում է հայկական տեղեկատվական դաշտում՝ հղում անելով ռուսալեզու ինչ-որ սքրինշոթի, որտեղ շարադրված է նույն միտքը, սակայն կրկին առանց որևէ աղբյուրի նշման։

Այս «լուրը» հրապարակվել է նաև Հայաստանում գրանցված որոշ լրատվամիջոցների կողմից, այդ թվում՝ ԱԶԳ շաբաթաթերթում։ Ավելին, ArmPulse-ի գլխավոր խմբագիր Արթուր Պետրոսյանը կապ է հաստատել խմբագրության հետ՝ փորձելով ճշտել հրապարակման սկզբնաղբյուրը։ Սակայն «ԱԶԳ»-ի գլխավոր խմբագիրը հայտարարել է, թե դա «չակերտների մեջ է վերցված և ուրիշի ուղղակի խոսք է»։ Դրանից հետո նրան առաջարկվել է հեռացնել հրապարակումը և զերծ մնալ չստուգված տեղեկությունների տարածումից, սակայն այդ հրապարակումը մինչ օրս շարունակում է մնալ կայքում։