Թուրքիայի ԱԳ նախարարը կայցելի Մոսկվա․ օրակարգում՝ նաև Հարավային Կովկասը և հայ-թուրքական կարգավորումը

Հունիսի 15-17-ը Թուրքիայի ԱԳ նախարար Հաքան Ֆիդանը աշխատանքային այցով կգտնվի Մոսկվայում՝ Ռուսաստանի ԱԳ նախարար Սերգեյ Լավրովի հրավերով, այս մասին հայտնում է ՌԴ ԱԳՆ-ն:

Կողմերը նախատեսում են քննարկել Մերձավոր Արևելքում, Սիրիայում, Լիբիայում և Սևծովյան տարածաշրջանում ստեղծված իրավիճակը, ինչպես նաև երկկողմ տնտեսական համագործակցության հարցերը։

Ռուսաստանի ԱԳՆ-ի փոխանցմամբ՝ բանակցություններում առանձին ուշադրություն կդարձվի Հարավային Կովկասին, այդ թվում՝ տրանսպորտային հաղորդակցությունների ապաշրջափակմանը և տարածաշրջանի հետպատերազմյան վերականգնմանը։ Մոսկվան նաև հայտարարել է, որ ողջունում է հայ-թուրքական հարաբերությունների կարգավորման գործընթացը և աջակցում է խաղաղ ու կանխատեսելի Հարավային Կովկասի ձևավորմանը «3+3» տարածաշրջանային համագործակցության հարթակի շրջանակում։