Շուրջ 173 մլն դրամ կհատկացվի Հրազդանի կիրճում հանգստի գոտու կառուցման ծրագրին

Երևանի Աթենքի փողոցին հարող Հրազդանի կիրճի սկզբնամասից շուրջ 5.5 կմ հեռավորության վրա գտնվող հատվածում նախատեսվում է կառուցել բազմաֆունկցիոնալ հանգստի գոտի։ Հարցը քննարկվեց Երևան քաղաքի ավագանու նիստի ընթացքում:

Ծրագրի շրջանակում նախատեսվում է ստեղծել հարմարավետ զբոսայգի, հանգստի գոտիներ, ինչպես նաև սպորտային և տարբեր միջոցառումների անցկացման հարթակներ ու կինոդիտման տարածքներ:

Երևանի քաղաքապետ Տիգրան Ավինյանի խոսքով նախագիծը Հրազդանի կիրճի վերակազմակերպման ընդհանուր հայեցակարգի մի մասն է։Քաղաքապետը նշեց, որ արդեն առկա են մի շարք կոնկրետ ծրագրեր, և տվյալ նախագիծը մոտ ապագայում կմեկնարկի, քանի որ ընտրված է իրականացնող կազմակերպությունը։

«Ասիական զարգացման բանկի գործընկերների աջակցությամբ արդեն մշակվել է կիրճի ամբողջական վերակենդանացման հայեցակարգ, որը ներառում է մի շարք բաղադրիչներ, և տվյալ ծրագիրը ներառված է այդ ընդհանուր շրջանակում։

Երևան քաղաքի ավագանու նիստում նախագիծն ընդունվեց քվեարկության արդյունքում՝ 38 կողմ, 2 դեմ և 16 ձեռնպահ: