Սամվել Կարապետյանը շնորհավորել է Գարեգին Բ Կաթողիկոսին՝ գահակալության 27-րդ տարեդարձի առթիվ

«Ուժեղ Հայաստան» կուսակցության առաջնորդ Սամվել Կարապետյանը շնորհավորական ուղերձ է հղել Ամենայն Հայոց Կաթողիկոս Գարեգին Բ-ին՝ օծման և գահակալության 27-րդ տարեդարձի կապակցությամբ։

Ուղերձում Կարապետյանն անդրադարձել է Հայոց Հայրապետների օծման պատմական նշանակությանը՝ ընդգծելով Հայ Առաքելական Սուրբ Եկեղեցու դերը հայ ժողովրդի հոգևոր շարունակականության և ազգային ինքնության պահպանման գործում։

«Մեր ազգի հազարամյա ողջ պատմության ընթացքում եղել է Ամենայն Հայոց Հայրապետի օծման ընդամենը 132 իրադարձություն։ Առաջին Հայրապետի՝ Սուրբ Գրիգոր Լուսավորչի օծումից մինչև Ձեր օծումը ձգվում է մեր ազգի հոգևոր շարունակականության անխզելի շղթան՝ իր 132 օղակներով»,– նշել է Սամվել Կարապետյանը։

Նա Գարեգին Բ Կաթողիկոսին մաղթել է քաջառողջություն, արևշատություն և կորով՝ հայրապետական առաքելությունը շարունակելու համար։

«Մաղթում եմ Ձեզ քաջառողջություն, արևշատություն և անսասան կորով՝ շարունակելու Ձեր հայրապետական առաքելությունը՝ ի զորություն մեր Սուրբ Եկեղեցու, ի միաբանություն մեր ժողովրդի և ի բարօրություն Հայրենիքի»,– ասված է շնորհավորական ուղերձում։