Սահմանադրական դատարանն այսօր կհրապարակի խորհրդարանական ընտրությունների արդյունքների վերաբերյալ որոշումը

Սահմանադրական դատարանն այսօր՝ ժամը 17։55-ին, կհրապարակի իր որոշումը Կենտրոնական ընտրական հանձնաժողովի՝ հունիսի 14-ի «ՀՀ ԱԺ հունիսի 7-ի հերթական ընտրությունների արդյունքներն ամփոփելու մասին» որոշման վիճարկման գործով։

Բարձր դատարանը հունիսի 26-ից սկսել էր ընտրական գործընթացի հետ կապված 7 քաղաքական ուժերի դիմումների միավորված քննությունը։ Շուրջ մեկ շաբաթ տևած դատաքննությունից հետո՝ հուլիսի 1-ին, դատարանը հեռացել էր խորհրդակցական սենյակ՝ որոշում կայացնելու։ Օրենքով սահմանված կարգով՝ այսօր լրանում է գործով որոշման ընդունման և հրապարակման վերջնաժամկետը։

Ըստ ընթացակարգի՝ Սահմանադրական դատարանը կարող է կայացնել հետևյալ որոշումներից մեկը.

• Անփոփոխ թողնել ԿԸՀ որոշումը,

• Անվավեր ճանաչել խորհրդարանական ընտրությունների արդյունքները,

• Անվավեր ճանաչել ընտրությունների արդյունքները և սահմանել մանդատների բաշխման նոր կարգ,

• Նշանակել ընտրությունների երկրորդ փուլ։

Որոշման հրապարակման գործընթացին հնարավոր կլինի հետևել ուղիղ հեռարձակմամբ։