Ռուսաստանը պաշտոնապես նախազգուշացրել է Երևանին. ԵՄ-ին ինտեգրվելու դեպքում գազի համաձայնագիրը կչեղարկվի

Մոսկվան պաշտոնական Երևանին տեղեկացրել է, որ Հայաստանի՝ Եվրոպական միությանն անդամակցելու գործընթացը շարունակելու պարագայում, ռուսական կողմը կկասեցնի կամ կչեղարկի գազի և նավթամթերքի մատակարարման վերաբերյալ երկկողմ համաձայնագիրը։

Այս մասին «ՌԻԱ Նովոստի» գործակալությանը հայտնել է ՌԴ ԱԳՆ պաշտոնական ներկայացուցիչ Մարիա Զախարովան։

Նրա փոխանցմամբ՝ այսօր՝ մայիսի 27-ին, Հայաստանում Ռուսաստանի դեսպանատունը հայկական կողմին է փոխանցել ՌԴ էներգետիկայի նախարար Սերգեյ Ցիվիլյովի պաշտոնական նամակը՝ ուղղված ՀՀ տարածքային կառավարման և ենթակառուցվածքների նախարարությանը։

Նամակում նշվում է, որ Երևանի կողմից դեպի ԵՄ քայլերը շարունակելու դեպքում, Ռուսաստանը միակողմանիորեն կկասեցնի կամ կչեղարկի (դենոնսացիայի կենթարկի) 2013 թվականի դեկտեմբերի 2-ին ստորագրված «Հայաստանի Հանրապետությանը բնական գազի, նավթամթերքի և չմշակված բնական ալմաստների մատակարարման ոլորտում համագործակցության վերաբերյալ» միջկառավարական համաձայնագիրը։