Ռուսաստանը մտահոգված է Հայաստանի՝ ՆԱՏՕ-ի և ագրեսիվ ԵՄ-ի հետ մերձեցման ընթացքով

Ռուսաստանը մտահոգված է Հայաստանի՝ ՆԱՏՕ-ի և Եվրամիության հետ մերձեցման ընթացքով, որը վերածվում է ագրեսիվ դաշինքի։ ՏԱՍՍ-ի հաղորդմամբ՝ այս մասին հայտարարել է Ռուսաստանի արտաքին գործերի նախարարության խոսնակ Մարիա Զախարովան։

«Մենք չենք կարող չմտահոգվել Հայաստանի ղեկավարության՝ եվրատլանտյան հանրության հետ մերձեցման ընթացքով, որի հիմնական քաղաքական գիծն ուղղված է հատկապես Մոսկվայի դեմ», - ասել է դիվանագետը։

 «Եվրամիությունն ինքնին տնտեսական միությունից վերածվում է ագրեսիվ միլիտարիստական ​​դաշինքի։ Նրա փաստացի դաշինքը ՆԱՏՕ-ի հետ՝ակնհայտ է»։ Զախարովան նաև նշել է, որ անգլոսաքսերը բացահայտորեն պարծենում են, թե ինչպես են, Հայաստանը խլում «ավտորիտար Ռուսաստանի ճիրաններից»։

Արտգործնախարարության պաշտոնական խոսնակը նաև նշել է, որ հայ ժողովուրդը կընտրի իր երկրի հետագա զարգացման իր ուղին։ «Դա նրանց որոշելիքն է։ Ես կցանկանայի ընդգծել, որ Ռուսաստանը հետաքրքրված է իսկապես ինքնիշխան և անկախ Հայաստանով, որին մենք միշտ դիտարկել ենք որպես հավասար գործընկեր», - հավելել էդիվանագետը։