Ռոսսելխոզնադզորն ահազանգում է՝ Հայաստանից ներմուծվող ապրանքներից բողոքներ կան

Ռուսաստան արտահանվող Հայաստանի բուսական և կենդանական ծագման արտադրանքի նկատմամբ առաջացած խնդիրները, որոնք ի հայտ են եկել մի քանի տարի առաջ, շարունակում են պահպանվել։ Այս իրավիճակից ելք կարող է լինել Եվրասիական տնտեսական միության շրջանակում տեղեկատվական համակարգերի ինտեգրումը, որը թույլ կտա ապահովել արտադրանքի հետագծելիությունը, հայտարարել է Ռոսսելխոզնաձորի ղեկավար Սերգեյ Դանկվերտը։

«Այն տեսականին և այն քանակը, որը գալիս է Հայաստանից, հիմք է տալիս ենթադրելու, որ ոչ ամբողջ արտադրանքն ունի հայկական ծագում։ Մենք այս խնդրով զբաղվել ենք և՛ 2024-ին, և՛ 2023-ին»,- ասել է Դանկվերտը «Россия 24» հեռուստաալիքին տված հարցազրույցում։

Առաջին հերթին խոսքը վերաբերում է մատակարարումների ոչ տրամաբանական աճին, ինչը կապված է ԵԱՏՄ շրջանակում շուկաներ մուտք գործելու պարզեցված կարգի հետ։

«Օրինակ՝ երեք տարվա ընթացքում Հայաստանը ծաղիկների մատակարարումը ավելացրել է 36 միլիոնից մինչև ավելի քան 100 միլիոն հատ։ Նման աճ կա նաև այլ ապրանքների դեպքում։ Մենք ստիպված եղանք ֆիտոսանիտար վերահսկողությունը տեղափոխել ավելի մոտ սահմանին»,- նշել է նա։

«Մենք նաև նկատել ենք, որ Ռուսաստանի տարածք ուղարկվող արտադրանքի մեծ մասը չի հասնում այն վայրերը, ուր պետք է հասներ: Մենք բավական երկար կարգավորել ենք այս հարցերը և տեսնում ենք իրականում մեծ քանակությամբ կարանտինային օբյեկտներ՝ ավելի քան 900 դեպք է արձանագրվել Հայաստանից եկող արտադրանքում, ինչը զգալիորեն բարդացնում է աշխատանքը։ Օրինակ՝ անհրաժեշտ է իրականացնել ախտահանում։ Ծաղիկների դեպքում պետք է հավաստագրենք արտադրության վայրերը, փորձել ենք նաև տեսա-ստուգումներ անցկացնել»,- ասել է ծառայության ղեկավարը։

Խոսելով կենդանական ծագման արտադրանքի մատակարարումների խնդիրների մասին՝ Դանկվերտը նշել է, որ այս ոլորտում նույնպես «մասամբ կարող է լինել ոչ հայկական ծագման արտադրանք»։

«Մենք նկատել ենք անհետագծելի արտադրանքի մատակարարումներ, օրինակ՝ կարագ, պանիրներ, իշխանի միս։ Հայաստանի լեռնային գետերի իշխանը որևէ կերպ չի կարող նման լինել նորվեգականին»,- նշել է նա։

Նրա խոսքով՝ այս ամենը հանգեցրել է նրան, որ Հայաստանից եկող մատակարարումների նկատմամբ կիրառվում են ավելի խիստ պահանջներ, այդ թվում՝ արտադրանքի հետագծելիության առումով։ Ստեղծված իրավիճակից ելքը Դանկվերտը տեսնում է ԵԱՏՄ շրջանակում անվտանգության վերահսկման տեղեկատվական համակարգերի ինտեգրման մեջ։

«Մեր էլեկտրոնային համակարգերը թույլ են տալիս արագ հետևել մատակարարվող արտադրանքին և արդյունավետ աշխատել»,- ասել է նա՝ նշելով, որ միության շրջանակում «դա առայժմ չի ստացվում»։