Պուտինը շնորհավորել է Ալիևին. «Մեծ նշանակություն ենք տալիս Բաքվի հետ դաշնակցային հարաբերություններին»

Ռուսաստանի Դաշնության նախագահ Վլադիմիր Պուտինը շնորհավորական նամակ է հղել Ադրբեջանի նախագահ Իլհամ Ալիևին՝ մայիսի 28-ին նշվող Անկախության օրվա առթիվ, հայտնում է Ադրբեջանի նախագահի աշխատակազմը:

Իր ուղերձում ՌԴ ղեկավարը շեշտադրել է Մոսկվայի և Բաքվի միջև առկա ռազմավարական կապերն և դրանց ազդեցությունը Հարավային Կովկասի անվտանգային միջավայրի վրա։

Վլադիմիր Պուտինն ընդգծել է Ռուսաստանի հանձնառությունը՝ խորացնելու փոխգործակցությունը Ադրբեջանի հետ տարբեր հարթակներում.

«Մենք մեծ նշանակություն ենք տալիս Բաքվի հետ մեր բարեկամական և դաշնակցային հարաբերություններին։ Համոզված եմ՝ համատեղ ջանքերով կկարողանանք ապահովել տարբեր ոլորտներում երկկողմ արդյունավետ համագործակցության, ինչպես նաև տարածաշրջանային ու միջազգային հարցերում փոխգործակցության հետագա զարգացումը»։

ՌԴ նախագահի ձևակերպմամբ՝ երկու պետությունների սերտ հարաբերությունները միտված են տարածաշրջանային կայունության ապահովմանը.

• Մոսկվայի և Բաքվի միջև գործընկերության ընդլայնումը բխում է Ռուսաստանի Դաշնության և Ադրբեջանի Հանրապետության ժողովուրդների հիմնարար շահերից։

• Այս փոխգործակցությունը լիովին համահունչ է Հարավային Կովկասում և Կասպից ծովի ավազանում անվտանգության ու կայունության ամրապնդման օրակարգին։