Փաշինյանի կառավարությունը շատ կարևոր քայլեր է ձեռնարկել, մենք պատրաստ ենք կարգավորմանը, երբ պայմանները հասունանան․ Ֆիդան

Թուրքիայի արտաքին գործերի նախարար Հաքան Ֆիդանը հայտարարել է, որ Հայաստանի վարչապետ Նիկոլ Փաշինյանի կառավարությունը շատ կարևոր քայլեր է ձեռնարկել Թուրքիայի հետ հարաբերությունների կարգավորման ուղղությամբ։ Նա հավելել է, որ Անկարան պատրաստ է հարաբերությունների լիարժեք կարգավորմանը, հենց որ դրա համար համապատասխան պայմաններ ստեղծվեն:

Ինչպես հաղորդում է «Արմենպրես» լրատվական գործակալությունը, Թուրքիայի արտաքին քաղաքական գերատեսչության ղեկավարն այս մասին ասել է «Turkiye» թերթին տված հարցազրույցում։

«Փաշինյանի կառավարությունը շատ կարևոր քայլեր է ձեռնարկել։ Էլ ավելի կարևոր քայլեր են արվել մեր նախագահի կամքով, ներառյալ՝ ուղիղ առևտուրն ու օդային բեռնափոխադրումները։ Նոր ժամանակահատվածում իրականացվելիք խնդիրները նույնպես հստակ են։ Մենք պատրաստ ենք կարգավորմանը, երբ դրա համար պայմաններ հայտնվեն»,- նշել է Ֆիդանը։

Հայաստանն ու Թուրքիան հարաբերությունների կարգավորման գործընթացը սկսել են 2022 թվականից՝ երկկողմ ձևաչափով աշխատելու համար նշանակելով հատուկ ներկայացուցիչներ.

• Հայաստանի ներկայացուցիչ՝ ԱԺ փոխնախագահ Ռուբեն Ռուբինյան,

• Թուրքիայի ներկայացուցիչ՝ ԱՄՆ-ում Թուրքիայի նախկին դեսպան Սերդար Քըլըչ։

Հատուկ ներկայացուցիչների մի քանի հանդիպումների արդյունքում կողմերը պայմանավորվածություն էին ձեռք բերել սկզբնական փուլում հայ-թուրքական ցամաքային սահմանը բացել երրորդ երկրների քաղաքացիների և դիվանագիտական անձնագիր ունեցող անձանց համար։ Այդուհանդերձ, նշված պայմանավորվածությունը մինչ օրս կյանքի չի կոչվել։