Փարիզում քննարկվել են պաշտպանական արդյունաբերության և տիեզերական անվտանգության ոլորտներում ՀՀ-ԵՄ համագործակցության հեռանկարները

Փարիզում տեղի է ունեցել հանդիպում Եվրոպական հանձնաժողովի պաշտպանության և տիեզերքի հարցերով հանձնակատար Անդրիուս Կուբիլյուսի հետ, հայտնել է ԲՏԱ նախարար Մխիթար Հայրապետյանը։ Հանդիպման ընթացքում կողմերը քննարկել են պաշտպանական արդյունաբերության, նորարարությունների, տիեզերական անվտանգության և Երկրի դիտարկման ոլորտներում Հայաստան-Եվրոպական միություն համագործակցության ընդլայնման հեռանկարները։

Անդրադարձ է կատարվել նաև Եվրոպական հանձնաժողովի Պաշտպանական արդյունաբերության և տիեզերական տարածության գլխավոր տնօրինության (DG DEFIS) հետ փոխգործակցության խորացմանը։ Քննարկումների առանցքում են եղել բարձր տեխնոլոգիական և պաշտպանական ոլորտներում համատեղ նախաձեռնությունների ու ծրագրերի իրականացման հնարավորությունները։