Նիկոլ Փաշինյանի հետ վեճի մեջ մտած Արթուր Օսիպյանը հացադուլ է հայտարարել

Արցախի հեղափոխական կուսակցության նախագահ Արթուր Օսիպյանը, որը «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանի հետ վիճաբանությունից հետո նախ ձերբակալվեց, ապա կալանավորվեց, հացադուլ է հայտարարել։ Տեղեկությունը ԶԼՄ-ներին հայտնել է արցախցի փաստաբան Դավիթ Հովհաննիսյանը։

Հովհաննիսյանի խոսքով` Արթուր Օսիպյանն առողջական խնդիրներ ի սկզբանե ունեցել է։

«Բժշկական փաստաթղթերը փոխանցվել են դատարանին»,– ասել է փաստաբանը։

Նա նշել է՝ այս պայմաններում հացադուլը է՛լ ավելի կվնասի Օսիպյանի առողջությունը։ Փաստաբանի խոսքով` Օսիպյանն իրեն համարում է քաղբանտարկյալ, քանի որ իր կարծիքը ազատ արտահայտելու պատճառով է զրկվել ազատությունից։ Հովհաննիսյանը տեղեկացրեց, որ պատրաստվում են երկամսյա կալանքի որոշման դեմ վերաքննիչ բողոք ներկայացնել։