Նիկոլ Փաշինյանը շնորհավորել է Էմանուել Մակրոնին. Հայ-ֆրանսիական հարաբերությունները հասել են աննախադեպ մակարդակի

ՀՀ վարչապետ Նիկոլ Փաշինյանը շնորհավորական ուղերձ է հղել Ֆրանսիայի նախագահ Էմանուել Մակրոնին՝ երկրի Ազգային տոնի (Հուլիսի 14-ի) առթիվ։ Այս մասին հայտնում են կառավարության մամուլի ծառայությունից։

Վարչապետն իր ուղերձում բարձր է գնահատել Ֆրանսիայի քաղաքական և գաղափարական ժառանգությունը՝ ընդգծելով, որ հուլիսի 14-ի խորհուրդը հանդիսանում է ժամանակակից ժողովրդավարական աշխարհի հիմնասյուներից մեկը։

Նիկոլ Փաշինյանը գոհունակությամբ արձանագրել է, որ վերջին տարիներին երկու երկրների հարաբերությունները հասել են «աննախադեպ մակարդակի»՝ ձեռք բերելով ռազմավարական բովանդակություն։ Ըստ գործադիրի ղեկավարի՝ համագործակցությունը վստահորեն զարգանում է ինչպես ավանդական (քաղաքական երկխոսություն, պաշտպանություն, տնտեսություն, կրթություն), այնպես էլ հեռանկարային ոլորտներում, ներառյալ՝ արհեստական բանականությունը և կլիմայական օրակարգը։

Ուղերձում հատուկ շեշտվել է Ֆրանսիայի դերը Հայաստան-ԵՄ գործընկերության խորացման և երկրում ժողովրդավարական բարեփոխումների աջակցության գործում։

«Բարձր ենք գնահատում Ֆրանսիայի և անձամբ Ձեր աջակցությունը Հայաստանի ինքնիշխանությանը, դիմակայնության ամրապնդմանը և ժողովրդավարական զարգացմանը»,- ասված է վարչապետի ուղերձում։

Նիկոլ Փաշինյանը վերահաստատել է պատրաստակամությունը՝ հետևողականորեն կյանքի կոչելու համատեղ հավակնոտ օրակարգը՝ ի շահ երկու բարեկամ ժողովուրդների։