Նիկոլ Փաշինյանը և Էմանուել Մակրոնը հեռախոսազրույց են ունեցել

Տեղի է ունեցել ՀՀ վարչապետ Նիկոլ Փաշինյանի հեռախոսազրույցը Ֆրանսիայի նախագահ Էմանուել Մակրոնի հետ։

Ֆրանսիայի նախագահը հերթական անգամ շնորհավորել է Նիկոլ Փաշինյանին խորհրդարանական ընտրություններում տարած հաղթանակի կապակցությամբ և հաջողություններ մաղթել առաջիկա գործունեության ընթացքում։

Զրուցակիցները վերահաստատել են Հայաստան-Ֆրանսիա երկկողմ հարաբերությունների հետևողական զարգացման և ռազմավարական գործընկերության ընդլայնման փոխադարձ պատրաստակամությունը։

Զրույցի ընթացքում կողմերն անդրադարձել են մի շարք առանցքային ուղղությունների․

• Ժողովրդավարություն և տնտեսություն․ Վարչապետ Փաշինյանը շնորհակալություն է հայտնել Ֆրանսիայի կողմից Հայաստանի ժողովրդավարական բարեփոխումներին ցուցաբերվող շարունակական աջակցության համար, ինչպես նաև ընդգծել է առևտրատնտեսական կապերի խորացման ու հայկական արտահանման հնարավորությունների ընդլայնման կարևորությունը։

• ՀՀ-ԵՄ հարաբերություններ․ Քննարկվել է Հայաստան–Եվրոպական միություն գործընկերության խորացման ընթացքը։

• Տարածաշրջանային խաղաղություն․ Անդրադարձ է կատարվել Հայաստանի և Ադրբեջանի միջև խաղաղության գործընթացին՝ երկուստեք կարևորելով Հարավային Կովկասում կայուն և տևական խաղաղության հաստատումը։