Նախագահ Վահագն Խաչատուրյանը հանդիպում է ունեցել Տաջիկստանի նախագահ Էմոմալի Ռահմոնի հետ

Հանրապետության նախագահ Վահագն Խաչատուրյանը Ղազախստան կատարած աշխատանքային այցի շրջանակներում հանդիպում է ունեցել Տաջիկստանի նախագահ Էմոմալի Ռահմոնի հետ, այս մասին տեղեկանում ենք ՀՀ նախագահի մամուլի ծառայությունից։

 Նախագահները գոհունակությամբ ընդգծել են Հայաստանի և Տաջիկստանի հարաբերությունների կայուն զարգացումը՝ միաժամանակ նշելով, որ առկա է համագործակցության չիրացված զգալի ներուժ, որի օգտագործումը պահանջում է նոր նախաձեռնություններ և հետևողական քայլեր։

"Զրույցի ընթացքում կողմերը հանգամանալից անդրադարձ են կատարել տարածաշրջանային զարգացումներին՝ ընդգծելով, որ 2025 թվականի օգոստոսյան իրադարձություններից հետո Հարավային Կովկասում ձևավորվել է որակապես նոր իրավիճակ։ Այս համատեքստում նշվել է, որ ստեղծված իրողությունները բացում են նոր հնարավորություններ տարածաշրջանի և հարակից երկրների համար՝ վերաիմաստավորելու իրենց համագործակցությունը և այն կառուցելու առավել կանխատեսելի, փոխշահավետ ու երկարաժամկետ հիմքերի վրա։ Հատկապես կարևորվել է խաղաղության, կայունության և հաղորդակցությունների զարգացման նշանակությունը՝ որպես տնտեսական ակտիվության և փոխադարձ կապերի խորացման կարևոր նախապայման։",–ասվում է հաղորդագրությունում։

Կողմերը նաև անդրադարձել են տնտեսական, բարձր տեխնոլոգիաների, արհեստական բանականության, կրթության և գիտության ոլորտներում համագործակցության ընդլայնման հնարավորություններին՝ շեշտելով նորարարությունների և փորձի փոխանակման կարևորությունը։

Նշվել է նաև միջազգային հարթակներում համագործակցության խորացման անհրաժեշտությունը։ Հանդիպման ավարտին նախագահները վերահաստատել են երկկողմ հարաբերությունների զարգացման և նոր մակարդակի բարձրացման պատրաստակամությունը։