Մեզ պետք է նոր մոդելի պետություն՝ ժամանակակից, դինամիկ. Նարեկ Կարապետյան

«25 տարի է՝ ապրում եմ այս համայնքում։ Այս համայնքի յուրահատկությունն այն է, որ մարդիկ ամեն ինչ շուտ են հասկանում, ունեն իրավագիտակցություն»,- Երևանի Արաբկիր համայնքի բնակիչների հետ հանդիպմանն այս մասին հայտարարել է«Ուժեղ Հայաստան» կուսակցության խորհրդի անդամ Նարեկ Կարապետյանը։

«Արաբկիրի ժողովրդին ասֆալտով, դատարկ բառերով չես զարմացնի, Արաբկիրի  ժողովուրդը փոքրիկ խմբակի իշխանության գալուց ընդամենը 2 տարի հետո հասկացավ՝ ովքեր են այդ մարդիկ, ու Հայաստանում առաջիններից նրանց մերժեց հենց Արաբկիրը՝ 2021-ին, որովհետև փորձ ունեն, գիտեն՝ ով է սուտասան, ով՝ ոչ»,- նշել է Կարապետյանը։

Դիմելով արաբկիրցիներին՝ Կարապետյանը շեշտել է՝ նրանք արժանի են ուժեղ քաղաք, ուժեղ ղեկավար ունենալուն։

«Մենք պետք է մեր երկրում փոփոխություններ անենք, որ մեր երեխաները չառերեսվեն այն խնդիրներին, որոնց մենք ենք առերեսվել, չտեսնեն այն խնդիրները, որոնք մենք տեսանք՝ վերջին տարիների ընթացքում

Մենք պետք է ամեն ինչ անենք, որ մյուս սերունդը լրիվ ուրիշ երկրում, ուրիշ միջավայրում ապրի»,- ասել է Կարապետյանը։

Նա հավելել է՝ եթե ուզում ենք, որ մեր երեխաները չտեսնեն այն դժվարությունները, որոնք մենք տեսանք,  ապա պետք է երկրի մոդելը փոխենք.

«Եթե մենակ ասֆալտ անելն է մեր հույսը, մենք 100 տարի հետո էլ լավ չենք ապրելու։

Մեզ պետք է նոր մոդելի պետություն՝ ժամանակակից, դինամիկ, որ տարածաշրջանի երկրներն էլ մեզնից օրինակ վերցնեն»։

Այս ամենը, ինչպես նշեց Նարեկ Կարապետյանը, հնարավոր է՝ միասնական ուժերով։