Մայիսի 22-23-ը Երևանում կլինի ԵԱՀԿ ԽՎ դիտորդական պատվիրակության ղեկավարը

Երևանում՝ հունիսի 7-ին կայանալիք Հայաստանի խորհրդարանական ընտրությունների դիտարկման նախապատրաստական աշխատանքների շրջանակներում ԵԱՀԿ Խորհրդարանական վեհաժողովի դիտորդական պատվիրակության ղեկավար Եվրոսիմա Պեյովիչը մայիսի 22-23-ը կգտնվի Երևանում: Այս մասին տեղեկանում ենք «Արմենպրես»- ից:

Այցի նպատակը նախընտրական իրավիճակի և ընտրությունների նախապատրաստական գործընթացի վերաբերյալ պատկերացում կազմելն է։

Այցի ընթացքում կլինեն  հանդիպումներ պետական մարմինների, ընտրական վարչակազմի, քաղաքական կուսակցությունների և դաշինքների, քաղաքացիական հասարակության կազմակերպությունների, ԶԼՄ-ների ներկայացուցիչների, ինչպես նաև արդեն Հայաստանում տեղակայված ԵԱՀԿ ժողովրդավարական հաստատությունների և մարդու իրավունքների գրասենյակի առաքելության ներկայացուցիչների հետ։

Ակնկալվում է, որ դիտորդական առաքելությանը կմասնակցեն ԵԱՀԿ տարածաշրջանի ավելի քան 30 երկրների ավելի քան 100 խորհրդարանականներ և աշխատակիցներ։