Կկանոնակարգվի կեղծ և ժամկետանց դեղերի ոչնչացման գործընթացը, պատշաճ վերահսկողություն կսահմանվի. նախագիծ

Ազգային ժողովն առաջին ընթերցմամբ քննարկել է ԱԺ պատգամավորներ Վանիկ Օհանյանի և Լուսինե Բադալյանի ներկայացրած օրենսդրական նախագծերի փաթեթը, որով փոփոխություններ և լրացումներ են առաջարկվում «Դեղերի մասին» օրենքում և Վարչական իրավախախտումների վերաբերյալ օրենսգրքում:

Նախաձեռնության նպատակն է կանոնակարգել կեղծ ու ժամկետանց դեղերի ոչնչացման գործընթացը և սահմանել պատշաճ վերահսկողություն:

Համազեկուցող Վանիկ Օհանյանի պարզաբանմամբ՝ ներկայումս վերահսկողական պատշաճ գործիքակազմի բացակայությունը թույլ չի տալիս տեսչական մարմնին լիարժեք պատկերացում կազմել դեղերի ոչնչացման իրական ընթացքի վերաբերյալ։

Պատգամավորը հայտնեց, որ փաստաթղթային ձևակերպումից հետո նախկինում եղել են ռիսկեր ու կոնկրետ նախադեպեր, երբ ոչնչացման ենթակա դեղերը կրկին հայտնվել են շուկայում և իրացվել: Նոր նախագծի հիմնական նպատակն է բացառել նմանատիպ դեպքերը:

Նախագծերի փաթեթը նախապես անցել է լայն քննարկումների փուլ Առողջապահության նախարարության, Շրջակա միջավայրի նախարարության, ինչպես նաև Առողջապահական և աշխատանքի տեսչական մարմնի գործընկերների հետ:

«Ունենք նրանց դրական կարծիքները: Մեզ ներկայացվել է նաև կառավարության հավաքական կարծիքը նոր առաջարկությունների տեսքով, որոնք բոլորն ընդունելի են եղել մեզ համար»,- նշեց Վանիկ Օհանյանը՝ հավելելով, որ համապատասխան լրամշակումներն արդեն արտացոլվել են առաջարկությունների ամփոփաթերթիկում:

Պատգամավորը կոչ արեց գործընկերներին կողմ քվեարկել նախագծին առաջին ընթերցմամբ՝ ընդգծելով, որ հեղինակները պատրաստ են քննարկել բոլոր նոր առաջարկները մինչև երկրորդ ընթերցում: