Կայացել է Նիկոլ Փաշինյանի և Միխայիլ Միշուստինի հանդիպումը

Կայացել է Նիկոլ Փաշինյանի և Միխայիլ Միշուստինի հանդիպումը։ Սա մեր առաջին հանդիպումն է Հայաստանում կայացած խորհրդարանական ընտրություններից հետո։ Հուսով ենք, որ նոր ձևավորվող կառավարությունը կապահովի հայ-ռուսական հարաբերությունների հետագա զարգացումը։ Շատ կարևորում ենք, որ Հայաստանի իշխանությունները շարունակեն ռուսական ներդրումների գործունեության համար ապահովել հարմարավետ միջավայր, հանդիպման ժամանակ ասել է Միշուստինը։ 

Միշուստինը վստահություն է հայտնել, որ այսօրվա ցուցահանդեսի արդյունքում հայ և ռուս գործարար համայնքները կգտնեն համատեղ համագործակցության հնարավորություններ։

Փաշինյանն իր հերթին շնորհակալություն է հայտնել կազմակերպված ցուցահանդեսի ու նաև դրան մասնակցելու հրավեր ստանալու առիթով և նշել , որ սա լավ հնարավորություն է որոշ հարցեր քննարկելու համար։

Վերջերս ի հայտ են եկել որոշ խնդրահարույց կետեր, և ես հույս ունեմ, որ մենք կքննարկենք և կլուծենք դրանք,- ասել է Փաշինյանը։
«Թե՛ ընտրություններից առաջ, թե՛ դրանից հետո մենք հանձնառու ենք Ռուսաստանի հետ մեր հարաբերությունների հետագա զարգացմանը։ Եվ, իհարկե, մենք հետաքրքրված ենք ԵԱՏՄ-ին մեր մասնակցությամբ և ԵԱՏՄ պայմանագրով նախատեսված մեխանիզմների նախատեսվածի համաձայն գործելու ապահովմամբ։ Ես կարծում եմ, որ սա ԵԱՏՄ հետագա զարգացման շահերից է բխում»,–հավելել է վարչապետը։