Քննարկվում է Ադրբեջանի հետ հնարավոր հանդիպման անհրաժեշտությունը․ Փաշինյան

Վարչապետ Նիկոլ Փաշինյանը հայտարարել է, որ հանձնարարել է ԱԽ քարտուղար Արմեն Գրիգորյանին ադրբեջանական կողմի հետ քննարկել հնարավոր հանդիպման կազմակերպման կամ դրա անհրաժեշտության հարցը, այս մասին նա հայտնել է այսօրվա ճեպազրույցի ժամանակ։

Նրա խոսքով՝ կողմերի միջև դիվանագիտական շփումները միտված են դիրքորոշումների պարզաբանմանը և իրավիճակի կառավարմանը։

Փաշինյանի գնահատմամբ՝ Հայաստանի և Ադրբեջանի փորձագիտական շրջանակներում առկա են միտումներ, որոնք կարող են սրել իրավիճակը, սակայն հայկական կողմը հետևողականորեն զբաղված է դրա վերահսկմամբ։

Վարչապետը նշել է, որ Հայաստանը շարունակական դիվանագիտական աշխատանք է իրականացնում միջազգային գործընկերների հետ՝ ընդգծելով, որ նման շփումները կարևոր են փոխադարձ դիրքորոշումների հստակեցման համար։

«Ցանկացած երկու երկրների ներկայացուցիչների հանդիպման նպատակը հարցեր բարձրացնելն ու դիրքորոշումները պարզաբանելն է, որպեսզի դրանք չձևավորվեն երրորդ կողմերի կամ մամուլի միջոցով», — ասել է Փաշինյանը՝ ընդգծելով նման ձևաչափերի կարևորությունը դիվանագիտական գործընթացում։