«Քաղաքացիական պայմանագիր» կուսակցությունը Սպիտակում է

Հունիսի 7-ին կայանալիք խորհրդարանական ընտրությունների նախընտրական քարոզարշավը շարունակվում է, և այս անգամ դրա շրջանակներում «Քաղաքացիական պայմանագիր» կուսակցությունն այցելել է Սպիտակ:

Սպիտակում  վարչապետ, «Քաղաքացիական պայմանագիր» կուսակցության վարչության նախագահ Նիկոլ Փաշինյանը խոսել է հայրենիքի ընկալման, ներքին խաղաղության և Լեռնային Ղարաբաղի հայերի մասին։

«Մենք ի վերջո պետք է արձանագրենք, որ հայրենիք փնտրելու գործընթացն ավարտված է։ Մենք մեր հայրենիքը գտել ենք, և դա Հայաստանի Հանրապետությունն է»,- ասել է նա։

Փաշինյանի խոսքով՝ եթե մարդկանց ենթագիտակցության մեջ շարունակվի ապրել նախկին բնակավայրեր վերադառնալու գաղափարը, ապա Հայաստանի Հանրապետությունը  մարդկանց մոտ կընկալվի ոչ թե որպես հայրենիք, այլ որպես ժամանակավոր կանգառ։

«Եթե մեր ենթագիտակցության մեջ անընդհատ լինի, որ մենք պետք է վերադառնանք Վան, Մուշ, Ղարաբաղ, Նախիջևան, մեր երկրին սկսում ենք վերաբերվել որպես կանգառ»,- նշել է նա։

Փաշինյանը խոսել է նաև Ղարաբաղից բռնի տեղահանված հայերի մասին և ասել է, որ նրանք պետք է հաստատվեն Հայաստանում և նրանք ևս Հայաստանը չպետք է ընկալեն որպես կանգառ: