Իրանի նախագահը շնորհավորել է Նիկոլ Փաշինյանին ընտրություններում տարած հաղթանակի կապակցությամբ

Իրանի Իսլամական Հանրապետության նախագահը պաշտոնական ուղերձ է հղել Հայաստանի վարչապետ Նիկոլ Փաշինյանին՝ խորհրդարանական ընտրությունների հաջող անցկացման և «Քաղաքացիական պայմանագիր» կուսակցության հաղթանակի առթիվ, հայտնում է Հայաստանում Իրանի դեսպանատունը:

Իր շնորհավորական ուղերձում Իրանի ղեկավարն ընդգծել է, որ հայաստանյան ընտրողների կողմից գործող կառավարությանը վերահաստատված վստահությունը վկայում է Հարավային Կովկասում խաղաղության, կայունության և տարածաշրջանային համագործակցության ամրապնդմանն ուղղված քաղաքական կուրսը շարունակելու ժողովրդի կամքի մասին:

«Վստահ եմ, որ Ձեր կառավարման նոր շրջանում երկու երկրների միջև առավել ծավալուն և առավել կառուցողական համագործակցության շնորհիվ ավելի կուժեղանա և կամրապնդվի վերջին տարիներին երկու երկրների հարաբերություններում ձևավորված դինամիկ և արգասաբեր ընթացքը»,- ասված է Իրանի նախագահի ուղերձում։

Թեհրանից նաև շեշտել են, որ երկկողմ հարաբերությունների խորացումը կնպաստի ինչպես Երևանի և Իրանի շահերի ապահովմանը, այնպես էլ ամբողջ տարածաշրջանում տնտեսական զարգացմանն ու անվտանգային միջավայրի կայունացմանը։ Իրանի նախագահը խաղաղություն ու բարօրություն է մաղթել Հայաստանի բարեկամ ժողովրդին և կառավարությանը։