Ինչ է սպասվում միգրանտներին ու բեռնափոխադրողներին, եթե Հայաստանը դուրս գա ԵԱՏՄ-ից

Ռուսաստանի Դաշնության նախագահ Վլադիմիր Պուտինը հայտարարել է, որ Մոսկվան ստիպված կլինի դադարեցնել Հայաստանի հետ ողջ տնտեսական համագործակցությունը, եթե Երևանը որոշի դուրս գալ Եվրասիական տնտեսական միությունից (ԵԱՏՄ), հայտնում են ռուսական ԶԼՄ–ները։

ՌԴ ղեկավարը մանրամասնել է այն հիմնական տնտեսական և լոգիստիկ հետևանքները, որոնց կբախվի հայկական կողմը նման որոշման դեպքում։

Ըստ Վլադիմիր Պուտինի՝ ԵՏՄ-ից Հայաստանի դուրս գալու դեպքում լրջորեն կփոխվեն բեռնափոխադրումների պայմանները.

•  Կողմերը ստիպված կլինեն բարձրացնել երկաթուղային բեռնափոխադրումների սակագները։

• Ոլորտը կվերադառնա նախկին կարգավորումներին, և ավտոմոբիլային բեռնափոխադրումների համար կրկին կներդրվի հատուկ թույլտվությունների տրամադրման համակարգը։

ՌԴ նախագահն առանձնակի անդրադարձ է կատարել նաև Հայաստանից Ռուսաստան մեկնող աշխատանքային միգրանտների խնդրին։ Նրա խոսքով՝ ԵՏՄ անդամության դադարեցումից հետո հայաստանցիները կկորցնեն ներկայիս արտոնությունները.

«Ռուսաստանում աշխատելու համար նրանք ստիպված կլինեն արտոնագրեր (պատենտներ) գնել։ Դա նշանակում է, որ պարտադիր բժշկական ապահովագրությունը նրանց հասանելի կլինի Ռուսաստանում առնվազն 5 տարի բնակվելու դեպքում»,- հայտարարել է Պուտինը։

Այսպիսով, ըստ ՌԴ նախագահի, ԵՏՄ-ից դուրս գալու դեպքում հայ-ռուսական տնտեսական հարաբերությունները կթևակոխեն կտրուկ սահմանափակումների և խստացված ընթացակարգերի փուլ։