Հիմնանորոգվում է Ծաղկաձորի մուտքից մինչև ճոպանուղի տանող 5կմ երկարությամբ ճանապարհահատվածը

Մեկնարկել են Ծաղկաձորի մուտքից մինչև ճոպանուղի տանող 5 կմ երկարությամբ ճանապարհահատվածի հիմնանորոգման աշխատանքները։ Այս մասին հայտնում են «Ճանապարհային դեպարտամենտ» հիմնադրամից։

Խոսքը Հ-55 (Հրազդանի տրանսպորտային հանգույց - Ծաղկաձորի ճոպանուղի) հանրապետական նշանակության ավտոճանապարհի կմ5+800 - կմ10+800 հատվածի մասին է։

Ինչ աշխատանքներ են նախատեսված.

• Հողային աշխատանքներ (որոնք այս պահին արդեն ընթացքի մեջ են)։

• Երկշերտ ասֆալտբետոնե ծածկի տեղադրում։

• Իջատեղերի, մուտքերի և արհեստական կառուցվածքների նորոգում։

• Ջրահեռացման վաքերի տեղադրում։

• Մայթերի կառուցում և այլ հարակից աշխատանքներ։

«Զբոսաշրջային կարևոր նշանակություն ունեցող ճանապարհի հիմնանորոգումը կատարվում է ՀՀ պետական բյուջեի միջոցներով»,- նշված է հաղորդագրության մեջ։

Այս ճանապարհահատվածի արդիականացումը էականորեն կբարելավի երթևեկության անվտանգությունն ու հարմարավետությունը՝ նպաստելով դեպի առողջարանային քաղաք զբոսաշրջային հոսքերի ակտիվացմանը։