ՀՀ Էկոնոմիկայի նախարարը ներկայացրել է եվրոպական շուկա դիմելու ընթացակարգը

Կառավարության նիստի ժամանակ Էկոնոմիկայի նախարար Գևորգ Պապոյանը հայտնել է, որ ՀՀ-ն Եվրոպական հանձնաժողովի կողմից պաշտոնապես թույլտվություն է ստացել Եվրոպական միության երկրներ հայկական արտադրության սառեցված ձուկ և վերամշակված ձուկ, ինչպես նաև ձկնամթերք արտահանելու վերաբերյալ։

Նա ներկայացրել է եվրոպական շուկա դիմելու ընթացակարգը։ ԵՄ արտահանման համար տնտեսավարողները պետք է գրանցվեն TRACES համակարգում՝ դիմելով Սննդամթերքի անվտանգության տեսչական մարմին, որը կստուգի նրանց համապատասխանությունը սահմանված չափանիշներին։ Պահանջները վերաբերում են արտադրանքի անվտանգությանը, հիգիենային, հետագծելիությանը, մակնշմանը, պահպանման պայմաններին և արտադրական գործընթացներին։

Կառավարությունը սրանով սահմանում է այն պահանջները, որոնց պետք է համապատասխանեն ԵՄ երկրներ ձուկ և ձկնամթերք արտահանող ձկնաբուծական տնտեսություններն ու արտադրողները։ Ըստ կառավարության՝ կարգավորման նպատակն է ընդլայնել հայկական ձկնամթերքի արտահանման հնարավորությունները դեպի եվրոպական շուկա։