ՀՀ ԱԳ նախարարի տեղակալն ընդունել է Պորտուգալիայի նորանշանակ դեսպանին

ՀՀ արտաքին գործերի նախարարի տեղակալ Մնացական Սաֆարյանն ընդունել է Հայաստանում Պորտուգալիայի Հանրապետության նորանշանակ դեսպան Սառա Ֆերոնյա Մարտինսին (նստավայրը՝ Մոսկվա)՝ հավատարմագրերի պատճենը հանձնելու կապակցությամբ։ Այս մասին հայտնում են ՀՀ ԱԳՆ-ից։

Նախարարի տեղակալը շնորհավորել է դեսպանին դիվանագիտական առաքելության մեկնարկի առթիվ՝ մաղթելով արդյունավետ գործունեություն։ Մնացական Սաֆարյանը վստահություն է հայտնել, որ դեսպանի պաշտոնավարման ընթացքում Հայաստան-Պորտուգալիա հարաբերություններն առավել կամրապնդվեն՝ նպաստելով փոխշահավետ համագործակցության ընդլայնմանն ու զարգացմանը։

Զրուցակիցները մտքեր են փոխանակել երկկողմ օրակարգի մի շարք հարցերի շուրջ՝ կարևորելով առևտրատնտեսական կապերի ակտիվացումը։ Այդ համատեքստում անդրադարձ է կատարվել եվրոպական շուկայում հայկական արտադրանքի ներկայության ընդլայնմանն ու նոր հնարավորությունների բացահայտման հեռանկարներին։

Հանդիպման ընթացքում կողմերը քննարկել են նաև տարածաշրջանային և միջազգային օրակարգի արդիական հարցեր: