Հեղուկ գազի գները շարունակում են աճել․ վարորդները կանգնած են նոր թանկացման առաջ

Երևանում հեղուկ գազի գները կրկին աճել են։ Վերջին օրերին մի շարք լցակայաններում մեկ լիտր հեղուկ գազի արժեքը հասել է 250 դրամի՝ առաջացնելով վարորդների դժգոհությունը։

Վարորդների խոսքով՝ գների բարձրացումը տեղի է ունենում գրեթե անընդհատ, մինչդեռ պաշտոնական պարզաբանումներ կամ հստակ հիմնավորումներ չեն ներկայացվում։ Լցակայանների աշխատակիցները թանկացումը հիմնականում պայմանավորում են Վերին Լարսի ճանապարհին եղանակային բարդ պայմաններով՝ նշելով, որ առատ ձյան պատճառով բեռնափոխադրումները խոչընդոտվում են։

Շատերը նշում են, որ գազը շարունակում է մնալ ամենապահանջված վառելիքներից մեկը, և դրա թանկացումը անմիջապես անդրադառնում է ինչպես տրանսպորտի, այնպես էլ առօրյա ծախսերի վրա։

Միևնույն ժամանակ, ոլորտում երկար տարիներ քննարկվող հարցերից մեկը շարունակում է չլուծված մնալ․ Հայաստանում այդպես էլ չի ձևավորվել արդյունավետ կարգավորող մեխանիզմ կամ մարմին, որը լիարժեք վերահսկի շուկայում գնագոյացման գործընթացը։

Լուսանկարը՝ Armpulse.am-ի․