Հայաստանում ցմահ ազատազրկված անձանցից մեկն ազատ է արձակվել

Շուրջ 22 տարի բանտում անցկացնելուց հետո ազատ է արձակվել ցմահ դատապարտյալ Արթուր Քոչարյանը։ Դատարանը բավարարել է նրան պայմանական վաղաժամկետ ազատ արձակելու (ՊՎԱ) վերաբերյալ միջնորդությունը։ Լուրը լրատվամիջոցների հետ զրույցում հաստատել են ՀՀ Քրեակատարողական ծառայությունից։

Արթուր Քոչարյանը ցմահ ազատազրկման էր դատապարտվել համածառայակցի սպանության աղմկահարույց գործով։

•  Ըստ քրեական գործի նյութերի՝ 2004 թվականի սեպտեմբերի 19-ին Արցախի Մարտունու զորամասի զինծառայող Արթուր Մեսրոպյանն անհետացել էր։

• . Երկու օր անց՝ սեպտեմբերի 21-ին (ՀՀ Անկախության օրը), զինծառայողի դին հայտնաբերվել էր զորամասի պարսպից կախված վիճակում։

Այս գործով, Արթուր Քոչարյանից բացի, ամբաստանյալի կարգավիճակում էին հայտնվել նաև նրա համածառայակիցներ Ավետիք Թումանյանը և Սուրեն Չոբանյանը։

Առաջին ատյանի դատարանը նրանց ևս դատապարտել էր ցմահ ազատազրկման, սակայն հետագայում Վերաքննիչ դատարանը վերանայել էր որոշումը՝ վերջիններիս պատիժը փոխելով 15 տարվա ազատազրկման։

Արթուր Քոչարյանն իրեն առաջադրված մեղադրանքը երբևէ չի ընդունել։ Տարիներ շարունակ նա և նրա պաշտպանական կողմը պնդել են, որ մեղադրական եզրակացությունն ու դատավճիռները կայացվել են բացառապես մեկ այլ ծառայակցի ցուցմունքների հիման վրա, որոնք նախաքննության ընթացքում փոխվել են 6 անգամ և պարբերաբար լրացվել։