Հայաստանի ներքաղաքական զարգացումներին է անդրադարձել Վրաստանի նախկին նախագահ Միխեիլ Սաակաշվիլին

 Հայաստանի ներքաղաքական զարգացումներին սոցցանցի իր էջում է անդրադարձել Վրաստանի նախկին նախագահ Միխեիլ Սաակաշվիլին: Սամվել Կարապետյանին նա համեմատել է վրացի միլիարդատեր Իվանիշվիլիի հետ, և հայ ժողովորդին խորհուրդ տվել չկրկնել Վրաստանի սխալը։

«Սամվել Կարապետյանը Իվանիշվիլիի հայ տեսակն  է։ Կարծում եմ՝ հայերը գիտեն, թե ինչ բերեց Իվանիշվիլին Վրաստան՝ կոռուպցիայի, հանցագործության, ազգային հարստության թալանի, զանգվածային քաղաքական բռնաճնշումների, սոցիալական ցանցերում խոսքի ազատության սահմանափակումների, միջազգային մեկուսացման և Մոսկվայի ստրկության վրա հիմնված բռնապետություն։
Սիրելի՛ հայ հարևաններ, արդյո՞ք սա այն երկիրն է, որը դուք ցանկանում եք։ Մի՛ կրկնեք Վրաստանի սխալը, անկախ նրանից, թե որքան քննադատաբար եք մոտենում ներկայիս կառավարությանը։
Վրաստանը նույնպես հայտնվեց առանց ռուսական գազի, բայց այն գնեց մյուս հարևաններից շատ ավելի էժան գնով։ Հայաստանը կարող է նույնը անել։
Այժմ, երբ դուք ունեք և՛ Եվրոպայի, և՛ Ամերիկայի աջակցությունը, մի՛ բաց թողեք այս հնարավորությունը և մի՛ մեկուսացեք աշխարհից։
Ինչպես ցույց է տալիս Վրաստանի շատ տխուր նախադեպը՝ օլիգարխի օգտին, և Փաշինյանի դեմ քվեարկելը կլինի բացարձակ ինքնասպանություն, և ես հույսս դնում եմ ձեր ազգի իմաստության վրա, որպեսզի դուք երբեք նման քայլ չձեռնարկեք»,- գրել է Սաակաշվիլին։