Հայաստանի համար գազի գինը  կարող է ձևավորվել շուկայական հիմքի վրա, եթե Երևանը որոշի դուրս գալ Եվրասիական տնտեսական միությունից.Պեսկով

Հայաստանի համար գազի գինը  կարող է ձևավորվել շուկայական հիմքի վրա, եթե Երևանը որոշի դուրս գալ Եվրասիական տնտեսական միությունից։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը:

Ինչպես հայտնում է ՏԱՍՍ գործակալությունը Պեսկովն ասել է.

 «Մենք լսել ենք Հայաստանի ղեկավարության հայտարարություններն այն մասին, որ գոյություն ունի գրավիչ, առավել քան արտոնյալ գին ռուսական գազի համար, ռուսական էներգակիրների համար։ Դա իսկապես այդպես է, Ռուսաստանը շարունակում է մնալ էներգակիրների հուսալի և պատասխանատու մատակարար բոլոր երկրների, հատկապես մտերիմ դաշնակիցների և գործընկերների համար: Սակայն այդպիսի ռեժիմը հնարավոր չէ այլ ինտեգրացիաների, այդ թվում Եվրամիության մասնակից երկրների համար ։ Այնտեղ գնագոյացումը բոլորովին այլ է՝ այն շուկայական է։ Մեր ընկերները Երևանում լավ գիտակցում են դա»։

Պեսկովը հետագա տնտեսական ինտեգրման ուղու ընտրության հարցը բաց է անվանել, սակայն հիշեցրել է, որ Մոսկվա կատարած այցի ժամանակ ՀՀ վարչապետ Նիկոլ Փաշինյանն ասել է, որ Հայաստանը մնում է ԵԱՏՄ լիիրավ անդամ, բայց միևնույն ժամանակ զարգացնում է իր հարաբերությունները արտաքին քաղաքականության այլ վեկտորներում, մասնավորապես՝ Եվրոպայի հետ: