Հայաստանը ԵԱՏՄ-ից դուրս գալու մտադրություն չունի. Օվերչուկ

Ռուսաստանի փոխվարչապետ Ալեքսեյ Օվերչուկը լրագրողներին ասել է, որ Հայաստանի շուրջ ստեղծված իրավիճակը կարող է որոշակի տնտեսական ռիսկեր առաջացնել Եվրասիական տնտեսական միության երկրների համար, և այդ ռիսկերը պետք է գնահատվեն, հայտնում է РБК-ն:

«ԵՄ-ին անդամակցությունը և Եվրասիական տնտեսական միությունն անհամատեղելի են։ Սկզբունքորեն, նրանք (ՀՀ-ն) նույնպես հասկանում են դա։ Որքան մենք գիտենք և լսում ենք, ներկայումս այնտեղ բավականին ակտիվ աշխատանք է տարվում եվրոպական չափորոշիչներին ու եվրոպական տեխնիկական կանոնակարգերին անցնելու ուղղությամբ։ ԵԱՏՄ անդամ պետությունների համար կարող են առաջանալ որոշակի տնտեսական ռիսկեր, և այդ ռիսկերը նույնպես պետք է գնահատվեն։ Ակնհայտ է, որ հարցի վերաբերյալ քննարկումներ կլինեն Եվրասիական տնտեսական բարձրագույն խորհրդում, եթե պետությունների ղեկավարները ցանկանան քննարկել այդ թեման»,- ասել է Օվերչուկը։

Նա կարծում է՝ Հայաստանը ԵԱՏՄ-ից դուրս գալու մտադրություն չունի՝ «շատ լավ» հասկանալով ինչպես արտոնությունների շրջանակը, այնպես էլ միության երկրների հետ առևտրի ծավալը։