Հայաստանը չի ստացել ՌԴ-ից վառելիքի և չմշակված ադամանդի մատակարարումների համաձայնագրի հնարավոր չեղարկման վերաբերյալ նամակ

Ռուսական «Կոմերսանտ» պարբերականը գրել էր, թե Ռուսաստանը կարող է միակողմանիորեն կասեցնել կամ չեղյալ հայտարարել Հայաստանին գազի, նավթամթերքի և չմշակված ադամանդի մատակարարումների վերաբերյալ համաձայնագիրը՝ կապված ԵՄ անդամակցության գործընթացի հետ։

Հրապարակման համաձայն՝ նման բովանդակությամբ նամակ իբր մայիսի 25-ին ուղարկվել է ՀՀ տարածքային կառավարման և ենթակառուցվածքների նախարարություն։

Ըստ  «Արմենպրես»-ի նախարարությունից հայտնել են, որ որևէ նման նամակ կամ գրություն չեն ստացել։

Հիշեցնենք՝ 2013 թվականի համաձայնագրով Ռուսաստանը Հայաստանին էներգակիրներ և չմշակված ադամանդներ է մատակարարում արտոնյալ պայմաններով։ «Կոմերսանտ»-ի պնդմամբ՝ համաձայնագրի հնարավոր դադարեցման դեպքում Հայաստանը կարող է պարտավորվել փոխհատուցում վճարել կամ չվճարված գումարները դիտվել որպես պետական պարտք։