«Հանրապետություն» կուսակցությունը կդիմի ԿԸՀ «Ուժեղ Հայաստանի» գրանցումը չեղարկելու հարցով

«Հանրապետություն» կուսակցությունը պատրաստվում է դիմել Կենտրոնական ընտրական հանձնաժողով (ԿԸՀ)՝ «Ուժեղ Հայաստան» կուսակցության ընտրական գրանցումը չեղարկելու հարցով։ Այս մասին «Ազատություն» ռադիոկայանին հայտնել է Արամ Սարգսյանի թիմակից, պատգամավորի թեկնածու Գրիգոր Առաքելյանը, որը նաև ներկայացնում է կուսակցությունը Սահմանադրական փոփոխությունների խորհրդում։

Այս քայլին կուսակցությունը դիմում է նախօրեին Հանրային հեռուստաընկերության եթերում կայացած նախընտրական բանավեճի ժամանակ վարչապետ Նիկոլ Փաշինյանի հնչեցրած հորդորից հետո։ Բանավեճի ընթացքում Փաշինյանը, դիմելով քաղաքական մյուս ուժերի թեկնածուներին, հայտարարել էր, որ կառավարող ուժն ինքնուրույն չի դիմելու հանձնաժողով, որպեսզի դա չդիտարկվի որպես պարտության վախ։

«Դա Կենտրոնական ընտրական հանձնաժողովի գործառույթ է: Պարոն Սիմոնյան, Պարոն Սարգսյան, ինչո՞ւ չեք դիմում, որ «Ուժեղ Հայաստանի» գրանցումը չեղարկեն, որ Ռոբերտ Քոչարյանի գրանցումը չեղարկեն, որ ԲՀԿ-ի... Ես կոչ եմ անում հրատապության կարգով հենց վաղը առավոտ դիմել»,- նշել էր Նիկոլ Փաշինյանը։

Փաշինյանի այս հանրային կոչին առաջինն արձագանքել է «Հանրապետություն» կուսակցությունը՝ սկսելով իրավական գործընթաց ընդդիմադիր միավորման գրանցումն անվավեր ճանաչելու ուղղությամբ։