Գերմանիայում քամու էներգիայի արտադրության նվազումը հանգեցրել է սակագների աճի․ Reuters

Գերմանիայում բազային ռեժիմով օգտագործվող էլեկտրաէներգիայի սակագները կտրուկ բարձրացել են։ Գների աճին նպաստել է քամուց ստացվող էներգիայի արտադրության կանխատեսվող անկումը։

Այս մասին այսօր՝ մայիսի 27-ին, հայտնել է Reuters գործակալությունը։

Պարբերականի գնահատմամբ՝ երկրի էներգետիկ շուկայում ստեղծված այս իրավիճակը կարող է հանգեցնել «էներգիայի ավելի թանկ աղբյուրներից կախվածության մեծացմանը»։

 Լոնդոնի LSEG բորսայի տվյալներով՝ Գերմանիայում քամուց ստացվող էներգիայի արտադրությունը, ըստ կանխատեսումների, նախորդ օրվա համեմատ կնվազի 9,7 գիգավատով (ԳՎտ)՝ հասնելով ընդամենը 4,4 ԳՎտ-ի։ Միևնույն ժամանակ, մնացորդային ծանրաբեռնվածությունը, որը ներառում է էներգիայի չվերականգնվող (ավանդական) աղբյուրները, կավելանա 8,2 ԳՎտ-ով՝ հասնելով 23,5 ԳՎտ մակարդակի։

Այս ամենին զուգահեռ՝ Գերմանիայի Սահմանադրության և ինքնիշխանության խորհրդի ղեկավար Ռալֆ Նիմայերը դեռևս մայիսի 16-ին նախազգուշացրել էր, որ «Դրուժբա» նավթամուղով երկրին փոխանցված նավթի պաշարները կսպառվեն մոտավորապես մայիսի վերջին, ինչից հետո կսկսվի այս էներգակրի դեֆիցիտը։