Եվրոպան պետք է ավելի մեծ աջակցություն ցուցաբերի Հայաստանին. Զելենսկի

Ուկրաինայի նախագահ Վոլոդիմիր Զելենսկին հայտնել է իր ֆեյսբուքյան էջում, որ երկրի պաշտպանության հետախուզությունը նոր տվյալներ է ստացել Ռուսաստանի հրթիռային արտադրության, պատժամիջոցների շրջանցման մեխանիզմների և արտաքին աջակցության վերաբերյալ։ Նրա խոսքով՝ Ուկրաինան գործընկերների հետ պատրաստում է նոր հակազդման միջոցառումներ՝ Ռուսաստանի նկատմամբ ճնշումն ուժեղացնելու նպատակով։

Զելենսկին նշել է նաև, որ Ռուսաստանը Ուկրաինայի հրթիռային տեխնոլոգիաների զարգացումը դիտարկում է որպես ռազմավարական սպառնալիք և փորձում է խոչընդոտել այդ ոլորտի առաջընթացը։

Նրա խոսքով՝ ուկրաինական հետախուզությունը ձեռք է բերել նաև ռուսական ներքին քաղաքական փաստաթղթեր, որոնք վերաբերում են Ուկրաինայի հարաբերություններին Մոլդովայի, Հարավային Կովկասի երկրների և Մերձավոր Արևելքի պետությունների հետ։ Զելենսկին պնդել է, որ Ռուսաստանի նպատակներից մեկն այդ երկրների հետ Ուկրաինայի ռազմավարական կապերի սահմանափակումն է:

Անդրադառնալով Հայաստանին՝ Զելենսկին հայտարարել է, որ Եվրոպան պետք է ավելի ակտիվ աջակցի այն երկրներին, որոնց նկատմամբ Ռուսաստանը փորձում է պահպանել ազդեցությունը։ Նրա խոսքով՝ դա հատկապես կարևոր է Հայաստանի համար՝ առաջիկա ընտրությունների նախաշեմին, քանի որ խոսքը ժողովրդի՝ սեփական ապագան ընտրելու հիմնարար իրավունքի մասին է։