Երևանի նախկին փոխքաղաքապետ Կ.Ա.-ի վերաբերյալ գործն ուղարկվել է Հակակոռուպցիոն դատարան

 Դատախազը 2026 թվականի հուլիսի 20-ին հաստատված մեղադրական եզրակացությամբ Հակակոռուպցիոն դատարան է հանձնել 2003-2009 թվականներին Երևանի քաղաքապետի առաջին տեղակալի պաշտոնը զբաղեցրած Կ.Ա.-ի վերաբերյալ քրեական վարույթի նյութերը:

Քրեական վարույթով պարզվել է, որ Կ.Ա.-ն, չարաշահելով պաշտոնեական լիազորությունները, մասնակցել է Ազատության պողոտայի և Բաբայան փողոցի հատման հատվածում գտնվող՝ պետական սեփականություն հանդիսացող և Հողային օրենսգրքի 60-րդ հոդվածով օտարման ենթակա չհամարվող 2 հողամասերի (յուրաքանչյուրը՝ 6000 քմ) ապօրինի օտարման գործընթացին:

Նախաքննության տվյալներով՝ այդ հողամասերն անհատույց օգտագործման իրավունքով տրամադրված են եղել «Հայրենիք-Սփյուռք կամուրջ» և «Սուրբ Լազար» ՀԿ-ներին։ Ըստ ՀՀ կառավարության որոշման՝ դրանք ներառված են եղել Երևանի կանաչ տարածքների ընդլայնման հատուկ պահպանվող տարածքներում և նախատեսված են եղել համաքաղաքային զբոսայգի հիմնելու համար։

Կ.Ա.-ն, տեղյակ լինելով հողամասերի կարգավիճակի մասին, իր ստորագրությամբ հաստատել է դրանց օտարման որոշումների նախագծերը, ինչից հետո դրանք ուղղակի վաճառքով օտարվել են հիշյալ ՀԿ-ներին՝ յուրաքանչյուրը 98 միլիոն 856 հազար դրամով: Այդ գործողությունների հետևանքով Երևանը զրկվել է նոր զբոսայգիներ ստեղծելու հնարավորությունից, իսկ հանրային տարածքները դարձել են մասնավոր։

Դատախազը Կ.Ա.-ի նկատմամբ հանրային քրեական հետապնդում է հարուցել 18.04.2003 թ. ընդունված Քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ՝ 2 դրվագ):

Հիշեցնենք, որ նույն վարույթի շրջանակում 2026 թվականի ապրիլի 23-ին քրեական հետապնդում էր հարուցվել նաև Երևանի նախկին քաղաքապետ Եր.Զ.-ի, քաղաքապետարանի աշխատակազմի ճարտարապետության և քաղաքաշինության վարչության նախկին պետ Ա.Լ.-ի և անշարժ գույքի կառավարման վարչության նախկին պետ Գ.Մ.-ի նկատմամբ:

Ծանուցում. Ենթադրյալ հանցանքի մեջ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ 🇦մ քրեական դատավարության օրենսգրքով սահմանված կարգով դատարանի օրինական ուժի մեջ մտած դատավճռով: