Երևանի մի շարք փողոցներում երթևեկությունը կսահմանափակվի

Երևանի քաղաքապետարանից հայտնում են, որ Ուսանողների և երիտասարդների օրվա առիթով նախատեսված միջոցառումներով պայմանավորված՝ մայրաքաղաքում կգործեն երթևեկության ժամանակավոր սահմանափակումներ։

Մայիսի 15-ին ժամը 22։00-ից երթևեկությունը ժամանակավորապես կսահմանափակվի Հանրապետության հրապարակի՝ Նալբանդյան և Աբովյան փողոցների հատվածում (շատրվանների դիմաց)։

Կեսգիշերից սկսած՝ (ժամը 24։00-ից) երթևեկությունը կսահմանափակվի նաև Ամիրյան փողոցում՝ Հանրապետության հրապարակից Ամիրյան-Զաքյան խաչմերուկի հատվածում։ Մայիսի 16-ին ժամը 16։00-ից սկսած՝ ժամանակավորապես կսահմանափակվի մուտքը դեպի Հանրապետության հրապարակ։

Հիշեցնենք, որ Հայաստանում 2016 թվականից մայիսի 16-ը նշվում է որպես Ուսանողների և երիտասարդների օր։