Երևանի քաղաքապետարանի գործակարգավարական խորհրդակցության ժամանակ այսօր քաղաքապետ Տիգրան Ավինյանը հայտնեց,որ Երևանում 2 շաբաթվա ընթացքում հանրային տրանսպորտի վալիդացիաների շնորհիվ հավաքագրվել է բավականին մեծ  գումար է։ Անդրադառնալով չվճարող ուղևորներին Տիգրան Ավինյանն ասաց, որ այն անձինք, որոնք բողոքում են, թե տրանսպորտի քանակը քիչ է, պետք է ֆիքսեն, որ չվճարելով սպասարկել են այն օրակարգը, որ տրանսպորտը շուտ չավելանա քաղաքում։

Ուղեվարձի հավաքման մասին խոսելով, Ավինյանն ասել է, որ անհարմարություն է ստեղծվում, բայց մեթոդն արդյունավետ է:

«Երկու շաբաթում մենք բավականին մեծ հավելյալ գումար ենք հավաքել։ Սա համեմատում եմ նախորդ 2 շաբաթվա հետ։ Որքան էլ անհարմարություններ է ստեղծում մեր մեթոդը մարդկանց համար, այնուամենայնիվ, կարգապահության տեսանկյունից այն բավականին արդյունավետ է։ Փաստացի, նախկինում չվճարող անձանց վճարելու հաշվին մենք 8 նոր ավտոբուսի գումար ենք հավաքել 2 շաբաթում»,- ասաց Ավինյանը։

Քաղաքապետը տեղեկացրեց, որ այս պահին 45 նոր տրոլեյբուս արդեն ճանապարհին է, սակայն հստակ ժամկետներ չնշեց՝ դրանց Երևանում լինելու մասին։ Տեղեկացրեց նաև, որ այս գործընթացից հետո կպատրաստեն 170 նոր ավտոբուսի գնման հայտը։