Երաշխավորում եմ՝ Ռոբերտ Քոչարյանի այդ ձայնագրությունն օրիգինալ է. Նիկոլ Փաշինյան

ՀՀ վարչապետ Նիկոլ Փաշինյանն անդրադարձել է ՀՀ երկրորդ նախագահ Ռոբերտ Քոչարյանի՝ երկու տարի առաջ հրապարակված սկանդալային ձայնագրությանը և քննադատել հասարակական կազմակերպություններին (ՀԿ)՝ անգործության համար։

Վարչապետի խոսքով՝ այդ ձայնագրության մեջ Ռոբերտ Քոչարյանը, դիմելով օտար երկրին, ասում է. «Դե դուք ինձ մտցրիք Հայաստանի քաղաքական դաշտ, ես հիմա պրոբլեմներ ունեմ, խնդրում եմ՝ ապահովեք իմ դուրս գալն այդ քաղաքական դաշտից»։

Փաշինյանը հիշեցրել է, որ այն ժամանակ ընդդիմադիր կողմը պնդում էր, թե ձայնագրությունը պատրաստված է արհեստական ինտելեկտի միջոցով, ինչին ի պատասխան ինքն առաջարկել էր ՀԿ-ներին միջազգային փորձաքննություն պատվիրել:

«ՀԿ-ները սիրում են մեզ քննադատել, բայց թույլ տվեք քննադատել ՀԿ-ներին։ Ինչո՞ւ այդ փորձաքննությունը չպատվիրվեց։ Ես՝ որպես ՀՀ վարչապետ, պատասխանատու ասում եմ, որ երաշխավորում եմ՝ դա օրիգինալ ձայնագրություն է։ Երաշխավորում եմ»,- հայտարարել է Նիկոլ Փաշինյանը։