Ընտանի կենդանիներ և թռչուններ՝ ընտրողների վրա ներազդելու համար. Հակակոռուպցիոն կոմիտեն քրեական վարույթ է նախաձեռնել

ՀՀ հակակոռուպցիոն կոմիտեում քրեական վարույթ է նախաձեռնվել՝ «Ուժեղ Հայաստան» կուսակցության համակրի և այլ անձանց կողմից ընտրողների վրա հնարավոր ապօրինի ներազդեցության դեպքի առթիվ։ Այս մասին հայտնում են Հակակոռուպցիոն կոմիտեի մամուլի ծառայությունից։

Հակակոռուպցիոն կոմիտեի և ՀՀ ազգային անվտանգության ծառայության (ԱԱԾ) համատեղ իրականացրած միջոցառումների արդյունքում ձեռք են բերվել փաստական տվյալներ, որոնք վկայում են ընտրական գործընթացներում օրենսդրական արգելքների ենթադրյալ խախտումների մասին։

Ըստ իրավապահ մարմինների տարածած հաղորդագրության՝ գործընթացն իրականացվել է հետևյալ մեխանիզմով.

• «Ուժեղ Հայաստան» կուսակցության համակիրը, այլ անձանց հետ համագործակցությամբ, ՀՀ տարբեր մարզերի բնակիչների բաժանել է ընտանի կենդանիներ և թռչուններ։

• Մինչև նշված «աջակցության» տրամադրումը, ճշտվել են օգնություն ստացող ընտանիքների չափահաս անդամների վերաբերյալ տվյալները։

• Ըստ քննության՝ օգնության տրամադրումը փաստացի պայմանավորվել է տվյալ ընտանիքներում պոտենցիալ ընտրողների առկայությամբ, և նպատակ է հետապնդել ներազդել վերջիններիս ընտրական վարքագծի վրա։

Դեպքի առթիվ ՀՀ հակակոռուպցիոն կոմիտեում նախաձեռնված քրեական վարույթի շրջանակներում արդեն իսկ կատարվել են բազմաթիվ վարութային գործողություններ։ Իրավապահները շարունակում են աշխատանքները՝ հանցավոր սխեմայում ներգրավված անձանց ամբողջական շրջանակը և դեպքի բոլոր հանգամանքները պարզելու ուղղությամբ։

Գործի վերաբերյալ այլ մանրամասներ հասանելի են կոմիտեի հրապարակած տեսանյութում։