Ընդդիմությունը որոշել է վերցնել մանդատները․ ԶԼՄ

Ընդդիմադիր ուժերը, կարծես, վերջնական որոշում են կայացրել և պատրաստվում են վերցնել իրենց պատգամավորական մանդատները՝ մտնելով Ազգային ժողով։ Այս մասին իր աղբյուրներին հղում անելով՝ հայտնում է ArmLur.am–ը։

Ըստ այդմ՝ հունիսի 7-ին կայացած խորհրդարանական ընտրություններից հետո ձևավորված ներքաղաքական քննարկումներն ավարտվել են հստակ եզրակացությամբ․ ընդդիմությունը հրաժարվում է խորհրդարանից դուրս պայքարի տարբերակից և ընտրում է քաղաքական պայքարը հենց Ազգային ժողովի ամբիոնից։

Ըստ լուրերիր՝ ընտրությունների վերահաշվարկի արդյունքներից հետո արդեն գրեթե կասկած չի մնում, որ ԲՀԿ-ն հաղթահարել է օրենքով սահմանված 4 տոկոսի շեմը։ Սա, ըստ ԶԼՄ–ի, նշանակում է՝ նոր խորհրդարանում ներկայացված կլինեն ոչ թե երկու, այլ երեք ընդդիմադիր ուժեր, ինչը էապես փոխում է ուժերի հարաբերակցությունը քաղաքական դաշտում։

ArmLur.am-ի աղբյուրների գնահատմամբ՝ ընդդիմադիր ճամբարում գերակշռել է այն մոտեցումը, որ մանդատներից հրաժարվելը կարող էր քաղաքական դաշտը թողնել միակողմանի վերահսկողության ներքո։ Սրանից հետևում է, որ խորհրդարան մտնելը հնարավորություն կտա իշխանություններին հակակշռելու, վերահսկողական գործիքներ կիրառելու և ընդդիմադիր օրակարգը ներսից առաջ մղելու համար։