Ընդդիմադիրներն են Ռուսաստանին կոչ անում արգելել Հայաստանից արտահանումները. Փաշինյան

Վարչապետ Նիկոլ Փաշինյանը Ծովինար համայնքում բնակիչների հետ հանդիպման ժամանակ անդրադարձել է Հայաստանի արտահանման, ԵԱՏՄ-ի հետ համագործակցության և ընդդիմության հասցեին հնչեցրել քննադատություն։

Փաշինյանի խոսքով՝ Հայաստանի գյուղատնտեսական արտադրանքի արտահանումը շարունակելու է աճել, այդ թվում՝ ԵԱՏՄ երկրների ուղղությամբ։

«Մեր առաջ թող չդնեն ընտրություն բիբարի ու պետության միջև։ Այո, Հայաստանում բիբար էլ, վարդեր էլ, ծիրան էլ աճելու են, և Հայաստանից արտահանումը կրկնապատկվելու է, այդ թվում՝ ԵԱՏՄ երկրներ»,– ասել է վարչապետը։

Նա նաև պնդել է, որ Հայաստանից արտահանումների սահմանափակման վերաբերյալ կոչերով ռուսական կողմին դիմում են ընդդիմադիր շրջանակները։

Փաշինյանը նշել է, որ ԵԱՏՄ-ի բարձրագույն և միջկառավարական խորհուրդների աշխատանքներին մասնակցող միակ պաշտոնյան է և վստահություն է հայտնել, որ ընտրություններից հետո, ժողովրդի աջակցությունը ստանալու դեպքում, կկարողանա տեղում լուծել առկա խնդիրները։

Վարչապետը նաև հայտարարել է, որ Ռուսաստանի նախագահ Վլադիմիր Պուտինի հետ ունեցել է «շատ ջերմ և ընկերական» զրույց՝ ընդգծելով, որ գործընկերներին Հայաստանի վերաբերյալ երբեմն սխալ տեղեկություններ են փոխանցվում։

Նրա խոսքով՝ ԵԱՏՄ-ի շուրջ քննարկումները պետք է կառուցվեն ոչ թե հնարավոր վնասների, այլ Հայաստանի համար ստեղծվող նոր հնարավորությունների և օգուտների շուրջ։